Dritter Ansatz

DRITTER ANSATZ

In re Mathematica in universum, sive de Numeris ac Figuris, sive de Motibus, aliisque rebus mensurabilibus agatur, omnia problemata huc redeunt, ut ex propositis conditionibus reperiatur productio quaesiti, sive certus operandi modus, quo absoluto, ipsis conditionibus desideratis eadem opera sit satisfactum. Est autem hoc loco conditio nihil aliud quam relatio quaesiti ad datum involvens magnitudinem. Operatio autem est quidam modus tractandi vel res ipsas datas per constructionem, vel earum characteres quibus repraesentantur per calculum. Ita vero institui potest operatio quo pleraque peragantur potius circa characteres, et ut novissime circa rem ipsam, quando ad eam denique accedendum est, pauca agenda supersint. Veluti si valorem cujusdam lineae quaesitae in numeris reperiamus, manifestum est inventam longitudinem in scala tantum quadam sumi debere, ut Constructio, sive operatio linearis absolvatur. Interdum tamen constructio ipsa quae linearum ductu fit satis commoda brevisque est aut elegantiam habet peculiarem. Quare ita instituendi sunt characteres, ut etiam constructiones per ipsos cognosci possint commodissimaeque earum eligantur.