De machina animata

DE MACHINA ANIMATA

Axioma hoc: dispositionem habenti non denegatur forma, adeo quidam certum esse existimant, ut sibi persuadeant, si massam eodem modo disponere possint, ut corpus humanum dispositum est, animam ei non defuturam, dicturique sint non se facturos corpus simile nostro, sed hominem nobis similem. Tali philosopho si in animum sibi induxerit horologium esse animatum, difficile erit persuadere contrarium. Sed quia entia multiplicanda non sunt, sufficit omnia in horologio per figuram et motum posse explicari.

Haec Cordemoy distinctio corporis et animae diss. 3.

Mihi videtur axioma verissimum, sed a nemine posse fabricari corpus humano perfecte simile, nisi qui possit servare Ordinem dividendo in infinitum. Itaque nulli angelo possibile est hominem vel ullum animal verum formare, nisi ex semine, ubi jam aliquo modo praeexistit. Facere posset machinam, quae forte externa specie non satis examinanti hominem mentiretur, revera homo vel animal non esset.