Sur la bonté des ouvrages de Dieu

 [Herbst 1684 (?)]

Ce grand Estre qui pense si parfaitement à tout, sans que ses pensées soyent traversées, et qui produit aussi tout suivant sa pensée, fait les choses comme il veut, c'est à dire selon qu'il le trouve bon.

On m'objecta, qu'il faisoit ce qu'il trouvoit bon pour luy même, mais non pas peut estre pour nous. Je répondis, qu'il ne seroit gueres parfait ny habile, s'il ne rendoit tout bon encor pour ses ouvrages. Et que je croyois que sans cela elles ne sçauroient estre bonnes pour luy, ou ce qui est la meme chose, ne le seroient pas assez. Car ce qui seroit encor bon pour eux, seroit mieux parlant absolument.