De propositionibus, notionibus, theorematibus

DE PROPOSITIONIBUS, NOTIONIBUS, THEOREMATIBUS

Propositiones accidentariae et particulares inprimis usum habent ad instantias seu ad infringendas propositiones, quae falso creditae sunt necessariae vel universales.

Propositiones quae ratione inveniuntur, sunt vel circa generalia, vel circa specialia.

Generalia sunt circa Notiones, Notis rem discriminantibus seu definitionem Nominalem facientibus natura priores vel aequales vel posteriores. Natura priores sunt Requisita prima, vel intermedia seu primorum requisitorum combinationes; aut etiam Requisitorum hujusmodi proprietates. Natura aequales sunt definitiones reales ex omnibus requisitis ita collectis, ut inde appareat possibilitas, deinde proprietates reciprocae quae demonstrantur sive intrinsecis sive extrinsecis assumtis. Natura posteriores sunt notiones, ad quas ipsa notio rei de qua agitur rationem habet requisiti.

Cum infinita possint condi Theoremata, ea tantum seligenda sunt quae ad problemata serviunt.