LEIBNIZ AN ISAAC JAQUELOT

Reponse: Berlin 21 Novembr.

Je n'ay point tardé, Monsieur de jouir du plaisir que vous m'avés fait en me communiquant vos pensées, sur l'argument contesté de M. Des-Cartes et d'executer vos ordres, en y melant les miennes. Si j'avois eu du loisir, j'aurois mis le tout au net, mais n'ayant receu vostre billet qu'hier, et le jour d'aujourdhuy estant un jour de poste, je n'ay pas pû le faire, et je n'ay point voulu differer. Nous avons un meme dessein, qui est celuy d'eclaircir la verité. Je vous feray tousjours connoistre que c'est un de mes premiers interests, et que je mets tout auprés celuy de plaire à des personnes de vostre merite et par consequent de me monstrer en toute occasion, Monsieur vostre etc.