LEIBNIZ AN MICHAEL GOTTLIEB HANSCH

Vir Clarissime

Ecce literas, quas occasione dissertationis Tuae elegantis et eruditae scripsi, quas spero fore ad mentem Tuam. Gratias etiam ago pro libris redemtis. Si forte occasione Nundinarum Brunsvicensium mitti in eam urbem fasciculus librorum, et Forstero Bibliopolae Hanoverano commendari posset, possent hac ratione mature ad me deferri. Sin minus, expectabo nundinas Lipsienses, unde per onerarium quendam vectorem vel Brunsvigam, vel huc usque libri mitti poterunt. Si Brunsvigam destinantur commendari poterit fasciculus vel arcula Dno Polich, Magistro illic postae S^mae domus Brunsvicensis.

Cui pecuniam dari velis quam pro me expendisti, indicabis[.] Si nemo occurrat, saltem in nundinis Lipsiensibus per Forsterum accip[i]es.

Gratias etiam ago, quod cum Dno Fritschio in mei gratiam locutus es.

Quod superest vale et me ama. Dabam Hanoverae 4. Aug. 1707

deditissimus G. G. Leibnitius P. S. Si pretium pro Alcmanis monumento, et Marsiglii Danubio non usque adeo nimium est, mallem eos libros accipere etsi imperfectos, quam plane iis carere. Idque inprimis de Marsigliano opere dictum velim, quod fortasse longius promotum non fuit.