HEINRICH HORCH AN LEIBNIZ

/

Vir Nobilissime ac Prae-Strenue, Domine ac Fautor Honoratissime.

Etiamsi tot tantaque sint Tua in Remp. literariam merita, ut omnes Mathematum Cultores ob praeclara Tua inventa, quibus omnium retro seculorum Mathematicos longo post Te intervallo reliquisti, merito Te suspiciant ac venerentur tanquam communem suum Praeceptorem; non ausus tamen fuissem, incomtis unquam literis meis temere ad Te affectare gradum, nisi per Gravissimos Viros, quorum merita non aliter ac jussa revereri queo, ad commercium me literarium quam humanissime invitasses. Ex qua proinde humanitate Tua ut quoddam in studia mea redundet emolumentum, veniam dabis, Vir Nobiliss. quod hoc Tibi Problema resolvendum proponam. Nimirum Tradere Tradere ... extensae: Am Rande wohl von Leibniz durch Doppelstriche gekennzeichnet. modum, quo Deus in mente sua formare quiverit ~~ideam extensionis, posito esse eum naturae tantum cogitantis et minimae extensae.~~ Dignum sane autumo hoc Problema cum Theologo, cujus interest nosse, quomodo, ajente S. Paulo, ex Deo sint omnia, et quomodo, ut Jesaias loquitur, coelos extenderit ex semet ipso? tum etiam Mathematico et Philosopho; quum id agat de extensione, communi objecto et Geometriae et Physicae. Cujus proinde genesin, si quam habet, sibi habere accuratius perspectam, multum sane apparet facere ad solidanda ipsam et principia harum disciplinarum: et praeterea etiam ad finiendam illam controversiam, quae hodie exercet eruditos, nimirum an extensio accensenda sit attributis Dei? Si enim hoc Problema deprehenditur esse contradictorium, ut multis videtur, manifestum fit, agnoscendam esse in Deo extensionem; si vero reale ac possibile, citra dubium referenda erit in censum rerum a Deo diversarum. Modum denique aperiet illius solutio, aliarum quoque rerum conceptus eruendi quasi ex sinu ipsius Dei, tanquam primi omnium rerum Exemplaris: quod quam proficuum sit perspiciendis intime rebus et quoad suam radicem, me etiam non dicente intelligit quivis. Neque dubito, solutionem illius Tibi, Vir Nobiliss. dudum jam esse in promptu, quum ea, ni admodum fallor, inveniri debeat ea via, qua Tu in rebus Mathematicis Orbi erudito adeo admirandum Te praestitisti. Vale interim ad rei literariae decus, ac favere perge

Praeclarissimarum Virtutum Tuarum Cultori perpetuo Henrico Horchio

Herbornae die 6 Jan. 1697.