LatinIllustris Excellentissimeque Vir, Patrone plurimum colende.
Qui Am Rand oben links wohl von Leibniz' Hand: Mejeri proximas reddidit commendatitias, eum consilio juvi, quantum potui. Honesta saltim
ac liberali videbatur facie. Specimen historiae anecdotae desiderium apud me concitavit maximum,
quippe qui sic me totum dedi Theoreticis, ut historica tamen habere in deliciis non
desinam. Epistolam quoque Historicam, ceu indicium benevolentiae luculentissimum, fui exosculatus.
Consequentiae a rectis ad obliqua demonstrandi rationem abs Tua Excellentia excogitatam
memini me oculis quondam usurpasse, verum tunc temporis nescio quibus negotiis
districtus eam in meos referre codicillos neglexi, quae nunc una cum ceteris Vagetianis Vulcano
cesserit. Weigelius Mathematum Professor Jenensis haud adeo pridem nos invisit, atque suis de
Schola Virtutis consiliis Nob. Dn. Placcium in suam pertraxit sententiam, quippe qui perpetuum
inter Weigelii tugendschul suamque Semeioticam parallelismum, adeo ut singulae paragraphi
hujus ex illa possint illustrari, depraehendisse sibi videtur. Nunc Havniae degit brevi ad
nos reversurus Weigelius. Eodem Nob. Placcio auctore ac instigatore novum in me suscepi onus
conscribendae Hamburgensis Gymnasii Historiae. Obrutus collegiis ante Paschatos festum ne
minimam quidem huic instituto dicare possum cogitatiunculam, dein manum admoturus operi,
modo licuerit subsidia conquirere suffectura. Bibliotheca nostra nunc demum justis exornabitur
indicibus, quos iri impressum non doleo, quandoquidem thesaurus alioquin absconditus foret,
etiamsi selectioribus libris non esse instructam nobilissimi emporii Bibliothecam exteri sint
demiraturi. D. Mayerus bina luci exponet scripta. Alterum de Pietistis Veteris Ecclesiae:
Alterum de [Bellarmino] malae fidei postulato a fidei sociis. Deus Te servet, Vir illustris, in Rei
Literariae emolumentum. Quae votorum summa est
Tuae illustri Excellentiae deditissimi Gerh. Mejeri.
L. P.P.
Hamburgi A. XCVI. XIV. Febr.
Illustri Summoque Viro Dn. Godofrido Guilielmo Leibnitio Potentissimi Electoris Consiliario
etc. Patrono meo plurimum colendo. Hanoveram. Francò.