Series II Band 3 · No. 41.
GERHARD MEIER (HAMBURG) AN LEIBNIZ
Hamburg, 28. Dezember 1695 (7. Januar 1696). [47.]
Illustris Excellentissimeque Vir, Patrone ac Promotor plurimum colende Suspiciende
Incomptis occupationes magis arduas interpellare neutiquam fuissem ausus, nisi ad Vagetium datae luculenti fuissent Tuae erga me benevolentiae interpretes. Incredibile memoratu est, quantopere in mea fuerim sinu gavisus, meas qualescunque dissertationes quendam a viro laudato calculum impetrasse. Nolui eorum imitari consuetudinem, qui nulla locorum habita ratione quaedam protrudunt abstrusiora, in emporiis adeo non vendibilia, ut nauseam prius excitent, quam introspiciantur, et nondum lecta condemnentur. Seculi vivendum est moribus, ne ad pauciores recidant studia favore omnium dignissima. Parum aberat, quin parádojon de Archangelis enthymema multum mihi creasset molestiae, quandoquidem tantum solet praejudicata posse opinio, ut etiam sine ratione valeat auctoritas. Verum fato nescio quo causam omnem sub dissertationis finem peroraram, ne ultra limites protrahi posset sententia. Quod si per collegia et respondentem licuerit, carnis resurrectionem, quoad licuerit, ex naturae libro illustrandam mihi sumam. Dein logicam analysin illi sum scripto applicaturus, quod foeminas esse homines negat. Videtur auctor illius a D. Sim. Gedicco aliisque minus comiter esse habitus, eo quod meris per comparationem responsionibus argumentationes Anabaptistarum Deitatem Christi labefactaturas elidere allaborat. Quod institutum adeo gravem promeritum esse censuram nullus arbitror.
Nunc quidem accuratior Epistolae ad Romanos analysis me tenet sollicitum. Fateor, ea nonnunquam suboriri dubia, ex quibus ne per Hamburgensem quidem Logicam licet eluctari. Noëmaticas B. Jungii Disputationes Vagetio tradidi juxta cum hisce literulis transmittendas. Si quid praeterea officii a me vel proficisci potest vel expectari, id omne libens Vestris dicabo usibus. Deus immortalis annum, qui illucescit, ex voto transigere jubeat, ut identidem, de fortuna optatis majori possim
illustri T. Excellentiae gratulari deditissimus Gerhardus Mejer
Hamb. A. XCV. XXVIII. Dec. L. et PP.