LEIBNIZ AN VINCENT PLACCIUS

Hanoverae 27 Jun. 1690

Nobilissime et Consultissime Vir, Fautor Honoratissime

Si unquam nunc certe sub initium literarum hac vulgari formula uti possum: Si vales bene est, ego quidem valeo. Nam per biennium et amplius domo abfui, per magnam Germaniae Italiaeque partem divagatus, idque jussu principis mei, et inquirendis Historiarum monumentis circa majores Serenissimae Gentis, supplendisque Archivorum nostrorum hiatibus. Nec sane pauca ex Suevia et Bavaria, sed maxime ex Italia attuli, quibus Guelfica illustrantur, et connexio Brunsvicensis Estensisque Familiarum a scriptoribus male tradita ex diplomatibus corrigitur et in clara luce collocatur. Nunc Deo favente reversus veteres necessitudines resumo; teque inter primos compello, cujus et doctrinam et candorem semper maximi feci. Spero Te valetudine optata frui, contigisse enim mutationem in melius magna mea voluptate vidi ex compellatione publica qua Magliabecchium aliosque amicos ad symbolam conferendam venationi larvatorum scriptorum tuae invitas. Hanc primus mihi Florentiae ostendit Magliabecchius. Dixi non satis sibi cavisse, dum enim mihi has tuas literas communicaret, eo ipso me procuratorem rerum tuarum fecisse contra semet; jamque muneris esse mei urgere, insistere, opportune, importune, ut mecum aliquid auferre possem ab ipso in usus Tuos. Sed nihil egi, etsi enim vir sit maximae lectionis; mirifice tamen distrahitur tum compellationibus amicorum domi suae, tum vero maxime Epistolis, quibus tantum non obruitur. Interim Vintimigliae specimen ipso suasore editum, acceperis. Hortatus sum deinde, ut eruditos sibi notos ex variis ordinibus religiosis excitet ad communem operam, id enim saepe ad ipsorum ordinum dignitatem laudemve pertinere. Et aderat forte Dominicanus aliquis vir doctus, qui non videbatur ab hac cogitatione alienus. Videbo an aliquid produxerit mea suasio.

Tu vero, inquies, alios hortaris, dum ipse desideriis meis dees. Mihi vero fateor, curta est supellex et pleraque quae in hoc genere noveram, tibi dudum explorata non dubito. Si qua sunt minus pervulgata, ea non occurrunt, distracto tot aliis cogitationibus. Hoc ipso momento, dum quaedam in Schedis meis revolvo, video annotasse me aliquando sequentia: 1. Trattato del titolo regio dovuto alla serenissima casa di Savoia in Torino 1633. fol. Exemplo quod vidi ascripta erant haec verba: Ill^mo Viro Claudio Expilli in Senatu Gratianopolitano Praesidi amplissimo Petrus Monodus Commentarioli hujus autor amicitiae observantiaeque suae~~~~ ~~*monimentum D. M.

*Hujusmodi alia fortasse nonnulla latent vel in schedis meis, vel in mente, sed ut dixi, non statim jussa comparent.

2. Basilii Valentini nomen esse fictitium et a duobus effectibus primariis lapidis~~ ~~philosophorum jactati sumtum divitiis regiis, et perfecta valetudine, dudum suspicatus sum, et Cl^mo Tollio sententiam meam Viennae aperui, qui ab ea non videbatur abhorrere, idque nuper~~ ~~indicavit in libello edito, titulo Sapientiae insanientis. Nescio an Rudolphus Imperator ut narrat* *Tollius, in Monachi hujus crediti res inquisierit, illud scio Philippum Electorem Moguntinum Erfordia potitum investigari jussisse apud Benedictinos ejus civitatis sed frustra. Ego ut verum fatear, dubito an scriptor sit tam antiquus, qui ut ipse videri vult libros suos composuerit eo tempore quo lues venerea innotuit; dictio enim Germanica recentius aliquid spirat, nisi dicere malimus fuisse scripta Basilii a Joh. Tholdio interpolata. Hic enim quorundam editor habetur. Et sunt qui credunt Tholdium cognatione junctum autori, quaedam ex ejus schedis in Haligraphiam* *suam transtulisse.

Non dubito quin noveris, duorum librorum Gallicorum quibus tituli: l'art de penser; et* *nouveaux Elemens de Geometrie; autorem esse Ant. Arnaldum. Res certa est, quoniam*~~ ~~*didici ex ipsomet olim Parisiis. Sed alterius libri itidem Parisiis editi hoc titulo: *Elemens de Mathematique Universelle*, in 4^o, autor est Joh. Prestet, qui laborem illum Malebranchii*~~ ~~*auspiciis suscepit; notus mihi erat uterque cum Parisiis versarer.

Nescio an non noris dudum annotarisque, autorem libri pro Danis contra Suecos sub Carolo Gustavo hostes scripti, qui se vocat Orosium Annilonem, fuisse Vitum Beringium.

~~Hortatu Boineburgii in Polonia legationem pro Neoburgico obituri libellum nomine Georgii Ulicovii Lithuani scripsit G. G. L., ubi autor positis certis definitionibus pene ad~~ ~~demonstrationis formam ostendere conatus est, quid tunc esset consultum ei Reipublicae. Boeclerus qui editum libellum a Boineburgio acceperat, eo valde delectabatur, ejusque in libello quodam posthumo meminit tanquam sine exemplo exquisiti. Exemplar ejus nullum habeo jam a multis annis. Sed quid te his minutiis teneo?

Apud Dn. Horbium (insignem apud vos verbi divini ministrum) biennio abhinc agebat eruditus quidam juvenis Medicus nomine Stahl, qui liberos Horbii ni fallor informabat. Is~~ ~~mihi solebat quaedam interdum significare nova et curiosa in illo quod colebat studiorum genere. Quaeso fac mihi hanc gratiam et inquire quorsum devenerit, et si vacat significa. Celeberrimum Morhofium non dubito progredi in praeclaro opere *Polyhistoris~~, si essem ipsi vicinior lubentissime cum eo aliquando cogitata conferrem. Sed haec per intervallum commode non fiunt.

Ante omnia nosse velim quo sint loco tua Ethicae Elementa, quorum consilio valde applaudo, quaeque alia nunc pares Te non minus quam publico digna et quid alioqui res literaria ferat novi. / Vale et fave Fautor eximie cultori obsequentissimo Gothofredo Guilielmo Leibnitio

P. S. Nuper habui in manibus indicem quorundam librorum larvatorum scriptorum ~~a Jesuitis, circa annum 1630 jam confectum, quem nescio unde descriptum inter schedas meas repereram. Sed nunc dum mittere volo, non comparet.~~ Redibit sub oculos haud dubie, nec tardabo eum ad te destinare.