LEIBNIZ AN FRIEDRICH SIMON LÖFFLER

Mihi non videtur Thomasius de substantiae natura male aut inutiliter quaesisse, neque ideo esse irridendus, ut quidam facere videntur, et plerumque qui aliorum studia irrident, non intelligunt. Vix ulla veritas recondita usu suo caret; solent philologi irridere philosophos ut inutiles subtilitates tractantes, et vicissim philosophi philologos, ut pro rebus verba captantes. Malebranchius salse ridet Hebraistas et Rabbinistas. Sed male, utraque pars. Vir prudens non facile aliquod studium contemnit. Si Tibi occasio sit, velim intelligat celeberrimus Thomasius, mihi valde probari quod in notionem substantiae inquirendum putat; et ob ignoratam substantiae notionem, etiam ignoratam fuisse veram corporis naturam, quam ego demonstravi non consistere in sola extensione.