LEIBNIZ AN FRIEDRICH NITZSCH

Ex responsione:

Phaenomeni duorum speculorum conjunctorum imagines pro anguli conjunctionis varietate multiplicantium, causam reddis admodum ingeniosam, nondum tamen meminisse possum numerum esse majorem, si angulus sit acutior, contrarium animo insederat. Fortasse interrogari Weigelius potest. Praeterea ni fallor apparebant imagines omnes in ipsa junctura, etsi objectum proxime speculo admoveretur, cum in delineatione Tua reliquae omnes praeter unam in ipsa junctura sint propiores oculo quam ipsum objectum. Deinde reflexiones reflexionum facient imaginem semper minorem, ut apparet si speculum in alio speculo intueare. At hic imagines erant si bene memini, magnitudine aequales, et proinde a se invicem indemnatae. Credo etsi quaedam tectae fuissent quas aliarum causas supponis illas, illas ipsas alias tamen apparituras fuisse. Praeterea nondum capio quomodo in ipsa junctura possit apparere imago, siquidem ea non potest esse unum continuum, alioqui specula non essent mobilia. A Weigelio fortasse et structuram discere possumus.