LEIBNIZ AN JOHANN GEORG GRAEVIUS

[ ... ] Occasionem ad Te scribendi ex Cl^mi Horbii literis sumseram, quibus significavit benevolentiam illam, qua superiores Germanos, cives tuos, omnes, tum eos ex iis potissimum prosequaris, quos verus meliorum literarum amor captos tenet, effecisse, ut nec cogitata mea qualiacunque, quae ille quidem tunc comperta habebat, de emendanda quousque privato fas est, Jurisprudentia, de reducenda ad positiones non multas, quodam velut Edicti perpetui novi specimine, Jurisprudentiae Romanae vastitate, de caeteris omnibus, quae quidem non omnino cum materia subjecta ex rerum natura abiisse constat, ex paucis quibusdam fundamentis ratiocinatione derivandis; de condendis vocabulorum JC^tis peculiarium definitionibus, quales fieri posse illustri specimine docuit Cujacius; de annotandis denique iis quae scientiae civilis ratio Legibus Romanis aut addi, aut adimi postulat, Tibi omnino displicerent. Nam quae alioquin de Arte Combinatoria, seu parte Logicae inventoria, de constituenda Hypothesi Physica nova, singulari quadam simplicitate claritateque phaenomenis satisfactura (quae nunc tribus plagulis comprehensa atque Illustri Societati Regiae Britannicae, cujus Secretarii hortatu et prodiit, inscripta, sub praelo calet), de machinamentis quibusdam fortasse publice profuturis parata sunt, apud Te memorasse, aut nunc etiam memorare prolixius, jactantiae poterat imputari. Nunc quando de redditione priorum literarum dubito, breviter haec repetenda duxi. [ ... ]