LEIBNIZ AN MARTIN FOGEL

Vir Nobiliss^e et Experientissime, Fautor Honoratissime.

Credo Te recte accepisse literas meas quas ad Nobil^mum Wedderkopf Antecessorem Chiloniensem destinaram. Collocutus sum nuper cum Eximio illo Mauritio egregiae prorsus doctrinae et humanitatis viro, qui mirifico Tui amore omnes, quibuscum occasio fert, ac certe inter eos me, implet implevitque. Quis sit Ravianorum Orientalium successus nosse desidero, si libros quos memorat, habet, thesaurum profecto possidet ingentem. Ludovicum de Compiegne Judaeum Metensem susceptore Rege Galliae baptizatum Heidelbergae nunc professorem fore Edzardo scripsi. Mauritius memoravit sxedíasma quoddam meum de motu, in acidulis Svalbacensibus raptim effusum Tibi in Angliam curandum dedisse, Te in nonnullis dissentire visum. Quod ego adeo non aegre fero, ut magnopere sententiam tuam desiderem ac nunc quidem etiam efflagitem. Quis enim in argumento tanti momenti tumultuarie tractato non facile lapsum fateatur. Unde si nondum Anglis misisti, differri missionem gratum erit. Videbis mox, ut spero, jam enim sub praelo calet, sxedíasma aliud paulo elaboratius de Hypothesi unici cujusdam motus in Tellure nostra suppositi, nec Tychonicis nec Copernicanis aspernandi, ex quo omnium naturae phaenomenorum ratio pendeat, et quia hortatore celeberrimo Oldenburgero Societatis Regiae Secretario, publico, societati ipsi inscribendum duxi. Quae sint motus Leges ex Jungii (quem ego virum, ut saepe testari soleo, inter illustria Germaniae sidera, quomodo alterius argumenti librum Browerus inscripsit, numero) sententia per Te nosse opto, quemadmodum et quo sint loco caetera ejus viri, quae reliquiarum instar sancte asservari, publice interest. Florentinam Academiam a pristino ardore valde remisisse ajunt. Tu rectius noveris, quemadmodum et caetera quae Italiae foecunditas quotidie profert, a nemine rectius quam Te sciri posse constat. Si rescribere cum Ampl^mo Edzardo dignaris poterit literis mihi inscriptis operculum aliud hoc titulo circumdari: A Monsieur Monsieur Lasser Conseiller de Son Altesse Electorale de Mayence, a Mayence. Quod restat vale faveque

Vir Ampl^me Cultori Tuo Gottfredo Guilielmo Leibnitio J.U.D.

Mog. 3/13 Feb. 1671. et Consil. Moguntino.

Nobil^mo et Experientiss^o Dⁿ^o Vogelio, Medico et polyhistori celeberrimo, Fautori meo Eximio. Hamburg. par couvert.