LEIBNIZ AN JAKOB THOMASIUS

Physica neque elegantius, neque amoenius, quam dialogo explicari possunt. Memini idem facere Bodinum, idem Gualterum Rivium, de vera ratione librae et staterae, sed et in itinere Ecstatico Kircherum, et passim illustrem Boylium, atque inprimis eleganter nuperrime Georgium Sinclarum, in arte nova gravitatis et levitatis: ut tot alios veteres mediosve, ac mediis propiores taceam. Ceterum doctissimum virum Abdiam Treu non ignoras, libros Aristotelis perì fysikh̃w ăkroásevw in scientiae formam elementaque, Euclidis exemplo reducere voluisse, ne soli Cartesiani de mathematica methodo gloriarentur.

Vidi nuper programma Lipsiense, haud dubie tuum, quo libellum intolerabiliter licentiosum, de libertate philosophandi, pro eo ac merebatur, tractasti. Videtur auctor non tantum politicam, sed et religionem Hobbianam sectari, quam is in Leviathane suo, monstroso, vel tituli indicio, opere sic satis delineavit. Nam et Criticae illius bellissimae, quam in scripturam sacram homo audax exercet, semina integro Leviathanis capite Hobbius jecit. Hobbium ipsum octuagenario majorem repuerascere nuper ex literis responsoriis Henrici Oldenburgii, societatis regiae Anglicanae secretarii, didici.

Idem haec recentissima Boylii opera memorat: 1) de formarum et qualitatum origine, 2) de argumento illo, num detur absoluta, seu perfecta quies in corporibus etiam solidissimis, 3) de qualitatibus systematicis, sive Cosmicis, 4) de suspicionibus Cosmicis, 5) de regionum *subterranearum iuxta ac submarinarum temperie, deque maris fundo. Quibus accessit ejusdem introductio ad historiam de qualitatibus particularibus.* Francof. d. 23 Dec. 1670.