VINCENT PLACCIUS AN LEIBNIZ

S. P. Vir Amplissime atque Excellentissime Dⁿ^e et Patrone honoratissime.

Feldeniana dum petentem expecto, domoque tantisper absum, foliorum Fogelianae Bibliothecae transmissionem procrastinavi. Ea nunc mitto quousque sunt impressa. Epistolam meam de Astrologia describendam nunc curo. Feldenianorum praeceptorum volumen est spissius, et intricatius scriptum, quam ut tam cito et a quovis describi queat, sed hominem mathematicorum signorum et numerorum curiosum, cui committatur ea descriptio requirit. Hypothesis Physica tua qualis sit ac quaenam et ubinam edita scire aveo. Propositum de accurato nimis examine imprimendorum, uti approbo, ita ne fraudi sit publico curandum puto. Jungianis et Fogelianis aliorumque aliis operibus, quaenam impedimenta nimium illud accurationis studium dederit scio. Nunquam ita quidquam limate a nobis edetur, quin post aliquot annos relegentibus plura emendanda sint vel augenda. Dies diem docet, ac ab eo in quem conscenderamus loco semper ulterius dabitur adscendere, quando renovatis quiete aliquot annorum viribus, ubi substiteramus olim fessi, nunc vegeti ceperimus nos erigere ad sublimiora. Nunquam eo perveniemus unde progredi nequeamus ipsi, quamdiu ĕk méroyw ginv́komen, et adhuc nondum tò téleion ^%)/eluh. Fortassis etiam aliquid est (concede libere philosophanti) ambitionis in hoc, si quis ne aliquando se corrigere necesse habeat, periculum, egregiis aliquibus remp. litterariam privandi nimis temere subire sustineat, ac meditationes non proletarias diu nimis lucem vitare cogat. Sane nullum ex meis etiam est scriptis, in quo non multa sim emendaturus, si recudendum veniat. Interim gratius mihi fieri nihil potest, quam si monear adhuc a quoquam. Imo illud adhuc a Te peto beneficium expetoque.

De animae immortalitate argumentum illud a justitia et bonitate Dei non ferentis tantam bonorum miseriam et malorum felicitatem quanta hujus vitae terminis solis inclusa depraehenditur, etiam SS. litterae unice urgent. Neque, fateor, efficacius ullum hucusque inveni. Ac nostrum non potest non ad Naturae naturantis, optime unumquodque ordinantis providentiam recidere. Cujus vigore non videtur appetitus esse datus, ut non expleatur, sed per accidens inserviat vitae tolerandae tantum, vel alii non suo usui. An Digbaeanas de animae immortalitate sic inscriptas demonstrationes, item Claubergii de Cognitione Dei ac nostri huc ex parte pertinentes meditationes consideraveris, et quousque approbaveris, scire cupio. Uterque Cartesium amat, neque tamen providentiae in hoc argumento rationem habet nullam: quin potius potissimam.

De Feldenianis apud me residuis haec habe: Theologica excerpta esse operis magni, a me in meos usus facta, sic ut neque legi facile ab alio, neque connexione ligari, nedum cui sint usui excerpta dijudicari possit, sed mihi solum inservire. Sic et Juris naturalis excerpta ex ore disserentis notata quae tamen ad contractus, quasi contractus etc. specialia pleraque procedunt, rationibus mere philosophicis nixa. Astronomiae compendium est breve nec integrum. Astrologia integra, pro exemplo ipsius auctoris Genesin habeas adjunctam. Prolegomena juris defensionem librorum juris et connexionem titulorum Juris Civilis et pontificii continent. Ad institutiones commentaria prolixa satis, sed hinc inde titulis ac titulorum partibus mutila sunt. Magis etiam de Jurisdictione, deque Historia Romana fragmenta, quae partes bonarum meditationum merae sunt. De Locutione emendata Tr. philosophiam circa Rhetoricam elocutionem non contemnendam habet, neque prolixa est, sicut et de demonstratione opusculum, et ad V. Metaphysicorum, quae ut et Topica satis elaborata sunt. Facile tamen sola Topica molem trium reliquorum superant omnium. Inventionem in Fortificatoris libelli conclusione memoratam aliquando ex ipso praelegente nobis eum libellum audivisse memini. Quantum recordor in eo positum, ut tota civitas ex meris ejuscemodi munimentis, ad instar stellaris munimenti Einer Sternschantzen exstruatur, cujus externae partes sint bene solidatae, internae nullo modo. Sic ad intimum usque munimentum, diruto exteriori, novum angustius, adeoque paucioribus copiis defendendum superesset, neque hostis occupato multum frui posset, utpote cujus exteriora priusquam occupasset destructa forent, interiora versus civitatem nunquam roborata fuissent. Haec hactenus, plura, ubi continuationem Catalogi mittam, quod fiet ni aliter jubes abhinc octiduo. Excell. T. N. cultor ingenuus V. Placcius

Hamb. 1678 d. 4. Maii.

Dn. Siverus salutat officiosissime, ac impressione Tassianorum, ad quotidianam corrigendi assiduitatem obligante quo minus rescribat impediri se nunciat.

Dem Wohledlen Vesten und Hochgelahrten Herren, Herren Gottfried Wilhelm Leibnitz. Fürstl. Hanoverischen Hochbetrauten Raht, meinem insonders HochgeEhrten Herren in Hanover.