ALBERT VON HOLTEN AN LEIBNIZ

Vir Excellentiss. Amice Colende S.

Ut scriberem ad Te aliquid literarum duplicem causam habui, altera est, quod nonnemo Professorum Tubingensium a me postulavit, ut si mihi intercederet cum aliquo Londinensium literarum quoddam commercium, ab illo peterem, ut Londini inquireret, an libri quos inclusa scheda exhibet, ibi prostent venales. Jam cum mihi quidem nulla, nisi per Te, detur copia, petito huic Doctissimi viri satisfaciendi, ideoque rogo obnixissime, ut velis hanc schedam ad aliquem tuorum amicorum ablegare, quo is eorum librorum, quotquot istic reperientur, pretium percontetur, quod ad te perscriptum cum fuerit, spero te pro nostra amicitia me de ea re sine mora certiorem facturum. Altera causa scriptionis mihi fuit, ut deliberarem tecum, an consultum putes, me, cum Grammaticam meam Hebraicam in cylindris exhibitam edere parem, inventum hoc Societati Regiae Anglicanae dedicare. Ut id cupiam plures habeo rationes, praecipue ut hoc pacto et Regi, et multis Doctissimis ac Illustribus viris innotescam. Quod si tibi videbitur, velim quam proxime ad me perscribas, quo titulo compellandi sint tum Rex, tum ipsum illud Societatis Collegium Eminentissimum. Puto inventum novitate sua et concinnitate non indignum fore tantis patronis. Forma externa oper[is] non parum habebit splendoris, quando convenienter emblemati exhibebitur arca cui incumbunt duo cherubini inaurati; intus vero apparebunt cylindri illi versatiles, et in operculo Decalogus punctationis Hebraicae, respondens numero, praeceptorum Mosaicorum, in ventre arcae addito libello, cui titulum feci lex Linguae Sanctae, ubi omnia Emblemati, quod de arca foederis sumptum est, exacte respondent. Mitto hic lapidarium quoddam quod, quia arbitrabar nondum ad tuas manus pervenisse, communicare volui: tu contra vide sis, ut mihi catalogum manuscriptorum Aethiopicorum Wanslebii dudum promissum transmittas. Rogo etiam, ut amplius cum Zunnero agas, de editione Commentarii Abarbenelis in Jonam a me versi. Wanslebii Relationem de Aegypto videre gestio, proximis nundinis Francofurtensibus dabitur forsitan illius potiundae copia. Spinos[a] Judaeus, ut mali ominis nomen gerit, ita pessimi exempli rem ausus est, et merito suo vapulabit a doctis. Pfeiffero eum prima quavis occasione propinabo excarnificandum, si ille non renuit. Interim vale, et rescribe si molestum non est, ad ea, quae a te scire percupio.

Tubingae Anno 1671. d. 18. Novembris. T. T. Albertus ab Holten.

Viro Nobilissimo, Excellentissimo, Doctissimoque Dn. Gothofredo Guilielmo Leibnizio J.U.D. amico ac Patrono Colendo pateant. Mogunziae.