Des Bosses an Leibniz

Jam a bimestri fere Paderbornam attigeram, jam per Hildesienses nostros sollicitaveram saepiuscule Dn. Behrensium, ut num Hannovera nunc degeres edoceret, cum gratissimae Tuae litterae post ambages nescio quas ad me pervenerunt.

Theodicaeo Tuo rigidiores non valde favere scribis. Bene est, at favent alii, fortasse meliores. Turnamino certe placere, ex verbis ejus cognosces quae hic transcribo: Vous pouvez mander par avance à Monsieur de Leibniz que j'ai lû avec beaucoup de plaisir son Theodicée et qu'il en verra dans nôtre Journal un extrait qui lui plaira; j'aurai l'honneur de lui en ecrire au long par la premiere occasion. Et fortasse jam promissis steterit, nam litterae, quarum hoc fragmentum est, 30 Octobris datae sunt.

Dum rem propius reputo, Theodicaei versionem aggredi vix audeo. Interpretem postulat non elegantem minus quam otiosum; mihi otium vix suppetit, facultas ne vix quidem. At ne me causari putes, en specimen in annexa scheda. Id si non respuis, eodem filo caetera persequi conabor, et satius erit, opinor, rudem ejus versionem extare quam nullam.

Mittam propediem Henrici Meldensis Episcopi Mandatum quod Jansenii et sectatorum ejus sensum ex fontibus ipsis eruit inque clara luce collocat, de quo sententiam Tuam intelligere aliquando gestio. Occasionem interim aucupor qua haec aliaque subinde communicem, quae deesse diu non poterit, si verum est, statam quadrigam quot hebdomadis Colonia hac ad vos commeaturam brevi.

…………………

Vale etc. Dabam Paderbornae pridie Calendas Januarias Anni 1712.

P.S. Si quae subinde dissertatiuncularum vel opusculorum Trivultiano Diario idoneorum exempla quibus carere possis ad manus Tuas perveniant, mitte quaeso ad me. ..................