Des Bosses an Leibniz

Litteras Tuas 7 Septembris datas accepi. Scripsi nuper ad Turneminum per mercatorem Lutetiam profectum, in cujus reditu desiderio Tuo satisfacturum me confido. Reperi et ego nonnullas gallici sermonis imperitos qui Theodicaeam Tuam latinam optarent. Post tres septimanas hinc Paderbornam migrabo Theologiae scholasticae curriculum a Deo Uno et Trino auspicaturus; si munus istud mihi tantulum otii concedet et Tu indulges, versionem horis subsecivis aggrediar, sed ea lege ut Tu revideas, errata corrigas et elucidationes addas sicubi necessariae aut utiles videbuntur.

Accepi Lutetia recentia duo mandata pastoralia: alterum Henrici Meldensis Episcopi, in quo quinque famosarum propositionum sensus damnatus ex ipso Jansenii libro eruitur et accuratissime expenditur; alterum Episcoporum Lucionensis et Rupellensis, in quo Jansenius ab Augustini sententia deviare ostenditur. Uterque liber, sed maxime prior, prorsus egregius est, et plane talis qualem circa eam quam vocant facti quaestionem dudum desiderare visus es. Utrumque communicabo Tecum, ubi venero Paderbornam.

Vidi nuper Elementa Physices autore Wiero Guilielmo Muys, Berolinensis Academiae socio; mihi placent in multis. Gratissimum erit de similibus libris si qui recenter prodeant, quos probes, erudiri subinde.

Vale etc. Dabam Coloniae Agrippinae 6 Octobris 1711.

P.S. Dum litteras hasce obsigno, afferuntur mihi litterae Domini Hartsoekeri una cum insertis ad Te datis quas hac vice non mitto, quia descriptas ad Turneminum mittere cupio. Mittam autem proxima posta. D. Harts. dicit, has fore postremas super hoc argumento.