Leibniz an des Bosses

Post longam absentiam demum simul et ad commercium nostrum literarium redeo. Non tamen Tuum Dn. Reingens commendare Serenissimi Ducis favore interposito omisi. Nam Domino Baroni de Imhof Barcinonem jussu ejusdem Serenissimi Ducis eunti res commendata est. Scripsit ille vero mihi Vienna 29 Junii his verbis: Je m'employeray volontiers pour le P. Reyngens, mais il faudra que cet honnete homme dresse un memoire pour obtenir ce qu'il desire. Car la lettre de son ami ne suffira pas pour cela. Ego non dubito, quin libelli supplices pro ipso missi sint Barcinonem. Et si res integra est, amicus ejus aut Procurator Barcinone agens, utiliter ad Dn. Baronem de Imhof recurret, ubi is Barcinonem appulerit.

Gratias ago pro Epistola Germanica Patris Spee, egregia sane, sed interdum plus affectus (etsi laudabilis) quam rationis spirante.

Cum visus sum attribuisse necessitatem moralem eventibus, mallem explicuisse mentem distinctius. Electio totius seriei contingentium tanquam convenientissimae habet necessitatem moralem, sed hoc non aeque commode enuntiatur de peccatis eam ingredientibus et per concomitantiam admissis.

Adamus non habet initio majorem inclinationem ad malum, quam ad bonum, cum creabatur, sed tunc cum peccatum instabat.

Cum quis eligit hoc modo, non implicaret contradictionem, si elegisset alio modo, quia rationes determinantes non necessitant.

Vasquii sententia, quam in Tua Epistola exhibes, videtur conciliabilis cum mea.

Cum sufficere dico unionem arctissimam inter Deum et Creaturam, plus quam moralem intelligo, et intelligent qui me legent; alioqui in Verbis luderem qui non est mos meus.

Maximas ago gratias pro Sinicis Vestrorum scriptis. Pontificis Maximi nunc est diserte dicere, velitne et jubeat Sinenses Christianos a receptis honoribus abstinere, qui Confutio et majoribus exhibentur. Id si diserte pronuntiat, Missio (ni fallor) illic extincta erit.

Adm. Reverendo Patri Bouveto scripsi aliquoties frustra, rogavique qualesnam essent libri quos (ipsius ut arbitror munere) recepi. Nam literae ejus, libris sociae, perierant.

Ecce quae ad novissimas Dom. Hartsoekeri repono. Optarem, ut Te medium interponeres, arbitrumque inter nos ageres. Vale. Dabam Hanoverae 8 Julii 1711.

P.S. Reverendissimo Patri Ptolemaeo et gratias pro libris missis a me referri et cultum meum perpetuum denuntiari peto.