Erster Ansatz

ERSTER ANSATZ

In Generali Mathematica, sive de Numeris ac Figuris, sive de Motibus, aliisque rebus mensurabilibus agatur, omnia problemata huc redeunt, ut cujusdam magnitudinis determinatio per alias datas reperiatur talis, quae sufficiat ad quaesitae ipsius constructionem. Determinatio est enumeratio conditionum quae sufficiant ad rem unam ab aliis omnibus distinguendam. Constructio vero est operatio quaedam exacta cujus requisita in potestate sunt, et qua certum aliquid producitur.

Ex omnibus porro determinationibus magnitudinum, simplicissima est aequalitas. Nam quod datae cuidam quantitati aut earum aggregato aut producto aequale est, sive cujus Valor est datus, id utique eo ipso datum est. Cumque ignota ex notis sufficienter determinata, valorem etiam habeant determinatum, sequitur ignota tum demum perfecte cognita haberi, cum eorum Valor est inventus.

Manifestumque est invento valore eo ipso inventam esse et constructionem, quoniam valor est expressio quantitatis productione quadam ex datis quantitatibus facta per operationes calculi quas in numeris semper peragere licet, quales sunt additio, subtractio, multiplicatio, divisio.