De vitiis in comoedia non exhibendis

 [1677 bis 1716 (?)]

Ajunt in Comoediis vitia ridicula exhiberi ad animos hominum ab iis deterrendos. Sed sciendum est quae risum excitant vitia ea semper exigua censeri. Itaque probari hoc institutum potest in erroribus levioribus, at scelera non ut ridicula sed ut horribilia et tragica ostendi debent. Et perniciosum est adulteria in comoediis conspici, etiamsi risui adulter exponatur. Haec enim spectacula libidinosum magis irritant quam emendant, et videmus improbos sese irridere mutuo ac de suis nequitiis jocari, quae bonos ad fletum et gemitus moverent.