De obligatione credendi. Erste Fassung

DE OBLIGATIONE CREDENDI. ERSTE FASSUNG De obligatione credendi Definitiones

Obligatio est necessitas sub poenae justae metu.

Poena justa est, quam infligeret sapientissimus ac potentissimus.

Sapientia est scientia felicitatis.

Scientia est cognitio certa.

Felicitas est status voluptatis sine dolore.

Credere est rationum quae persuadent conscium esse.

Probabilitas est excessus rationum pro re de qua agitur facientium supra contrarias.

Idem est esse in tua potestate sive pendere a voluntate tua, id est existere si velis. Axiomata

Existit Ens sapientissimum et potentissimum.

Nulla obligatio est ad ea quae non sunt in potestate. Theorema I

Quoties de fide agitur sola attentio diligens pendet a voluntate nostra.

Nam fides vel credere est rationum conscientia ut dixi ad rationum conscientiam opus est tum rationibus, tum earum conscientia sine sensu, rationes pendent a natura rei; solum ergo quod a nobis esse potest, est earum perceptio sine conscientia; ad eam autem pervenire possumus duobus modis, vel ut casu se offerant rationes, vel ut a nobis inquirantur, casus non pendet a voluntate nostra, inquisitio pendet ab attentione, sola ergo attentio cum de rationum conscientia id est fide agitur pendet a voluntate nostra quod ostendendum susceperamus. Theorema II

Nulla est obligatio ad ea, quae non sunt in potestate.

Quaecunque non sunt in potestate sapientis, ea non sunt necessaria sapienti, ergo si casu externo contingere hoc rerum statu non possunt, omnino contingere hoc rerum statu non possunt. Quae hoc rerum statu contingere impossibile, ea hoc rerum statu non contingere necessarium est, sive contrarium eorum est necessarium.