Catalogus Inventionum in Logicis

 [Frühjahr 1681 (?)] Catalogus Inventionum

In Logicis. Plato invenit usum definitionum et divisionum. Architas praedicamenta seu classes rerum. Plato Algebram, seu suppositionem quaesiti velut dati. Aristoteles formas propositionum, et syllogismorum absolutorum, et Loca Topica, seu fontes disserendi. Lullius artem disserendi de quovis longius produxit. Petrus Hispanus et Summulistae Grammaticam philosophicam seu doctrinam de supposito. Joh. Suisset calculator aestimationem seu Logicam Mathematicam circa rerum gradus. Joh. Hospinianus enumerationem Modorum absolutorum. Petrus Ramus demonstrationem conversionum suppositis identicis et figuris, vel aliarum figurarum ex prima suppositis identicis et conversionibus. Idem Leges universalitatis, necessitatis, et perfectionis, in propositionibus seu katà pánta, kat'ay̆tò et kauóloy prṽton ab Aristotele propositas ursit. Idem Dichotomias et in universum Tabulas seu divisionum et subdivisionum catenas frequentari fecit; quem secuti Zwingerus, Freigius, Keckermannus, Alstedius, aliique solidiores. Joach. Jungius Notionum species varias exquisitius consideravit, ostenditque non omnes consequentias revocari posse ad syllogismos.