JOHANN CHRISTIAN SCHULENBURG AN LEIBNIZ

Vir Illustris Maecenas Optime

Vix vester esse cepi, cum ecce me jam alio, Quackenbrüggam nempe, Deus vocet; Non tamen penitus ob Alternationis jura Vester esse desii, adeoque nec Tuus esse desinam, si qua saltem inserviendi Tibi mihi suppeditaretur occasio. Antiquitatum Wildeshusanarum neque in cippis neque in fenestris neque in chartis vel volam vel vestigium hactenus reperire potui, rogatus id etiam olim a Dn. Lunebergio Mushardo Athenaei, quod Bremae est, Regii Carolini Conrectore, in eruendis historiis ac Antiquitatibus ruminandis, credas, diligente. Solum Alexandri Patroni, ac Walberti, quantum lego, comitis picturam rudem valde, vetustam ac prorsus attritam in parietibus chori inferioris deprehendere adhuc datur. Faxit Deus ut futurum Munus Ecclesiasticum plus mihi succisivi temporis, quam praesens, quod ipsum praegnans inter alias mutandi hanc stationem causa fuit, largiri queat, quo vel tantilla mea opera et Deo et proximo inservire, atque Tibi quoque, Vir Illustris quaedam praestare possim officia. Sic vale Maecenas ac divinis Excubiis transcriptus age prosperrime favens constanter

Nominis Tui Celeberrimi Admiratori perpetuo Schulenburgio

Wildeshus. den 26. Aug. 1.

Ante Ferias Michaelis hinc non discedam si Deus voluerit ac vixerimus. Vale iterum ac me ama!