LEIBNIZ AN BARTHÉLEMY DES BOSSES

Admodum Reverende Pater

Quas adjectas vides literas ad R. P. Janningium curari peto, et pro Tua cura gratias repeto. Manuscriptum Gamansianum exscribitur, ut si opus remitti possit.

Spero juvenem tuo beneficio comparatum, strenue sese ad descriptionem accincturum; non erit cur prolixa nimis scriptione oneret chartas: nam in minore Codice plagulae non sunt plures quam circiter 75.

Famulus meus dixit Te nescio cujus libri transmittendi mentionem fecisse. Is qualis sit non bene memini.

Quod superest vale et fave. Dabam Hanoverae 11 Octobr. 1707

deditissimus Godefridus Guilielmus Leibnitius

Au Reverend Pere le R. P. des Bosses Theologien de la Compagnie de Jesus à Hildesheim