LEIBNIZ AN MICHAEL GOTTLIEB HANSCH

Vir Clarissime et doctissime

Recte accepi quae misisti, et quam bonum nomen fueris, ut par est, agnosco. Gratias officium facienti non debes.

Dn. Wolfius mihi Berolini locutus est, professionis dignitatem Halae nactus est, non dubito etiam emolumenta accessura. Erat cum eo juvenis eruditus Silesius, Mathematici studii non expers.

Spero Lipsiensem Academiam paulatim ad pristinam statum redituram, etsi urbi et studiis illic vulnus non facile sanabile fuisse inflictum satis appareat.

Ecce quid a TE petam, si vacat. Reverendissimus Meyerus Theologus Suediae Regis per Germaniam Primarius a me accepit librum Manuscriptum R. P. Longi de Congregatione Oratorii Parisina, in quo continetur Catalogus interpretum Scripturae sacrae Germanorum. Similem confecit pro aliis nationibus. Hunc in Germaniam misit, ut suppleretur et corrigeretur. Id Dn. Mayerus in se susceperat, sed multo jam tempore elapso Longus suum librum repetit. Rogo ergo ut Dn. Mayerum si adhuc Lipsiae agit, meo nomine adeas ac perofficiose salutes, et petas ut librum remittat, et si qua observata jam in eam rem habet, adjungat. Longus in eo jam est ut ab Editionibus scripturae sacrae suum opus Bibliothecae scripturariae incipiat. Si qua ea in re adhuc suppeditare potest Ampl^mus Maierus vel alius amicus, rem gratam et utilem faciet.

Quaesivit etiam a me R. P. Longus, quo anno obierint Andr. Acoluthus Vratislaviae, Matthias Beckius Augustae, Frider. Albertus, judaeus conversus, Elias Huterus, Marcus Meibomius, Sebastianus Schmidius, Caspar Ulenbergius, David Wolderus Hamburgensis mihi ignotus. Si in his succurrere potes per TE vel amicos rem gratam facies.

Si quid me voles, mitte quaeso Berolinum sub operculo a Monsieur Monsieur Jablonski secretaire du Roy. Quod superest vale et me ama[.] Dabam Berolini 25 Januar 1707

deditissimus G. G. Leibnitius

A Monsieur Monsieur Hansch Maistre ès arts et Collegiat à Leipzic