MENTET KETTWIG AN LEIBNIZ

Viro Illustri Godefrido Guilielmo Leibnitio Mecoenati suo magno Mentetus Kettwigius S. D. P.

Nolui Te nescium esse, tandem aliquando Codicem tuum J. G. diplomaticum, scriptaque Placciana ad me esse delata, doleo mihi prius nec lecta nec visa; sed uti huc usque illecta ac incognita fuere, ita diligentia compensabo, quicquid hac in re a me peccatum.

Fateor Placcium veram et non simulatam profiteri philosophiam, Teque codice tuo genuinum juris gentium usum digito quasi monstrasse veramque praxin, scientiae hujus, huc usque umbratilis, docuisse. Mea interesse putabo, studium in id omne conferre, ut Tua in rem meam vertam, quo, quid usus ac acta gentium a positis docentium principiis differant, penitius cognoscam. Librum Tuum de methodo docendae discendaeque jurisprudentiae, cujus etiam Placcius (: ut fugitivo oculo vidi :) in suo IC^to perfecto meminit, Bremae non repperi, dabo tamen operam, num aliunde comparare possim.

In Feltmanni scripta, post obitum Ipsius, non incidi, hoc tamen ab Eodemmet me audiisse, memini: Commentarium suum in pandectas quoad prṽta esse absolutum, posseque negotio facili totum opus absolvi, si cui Viro erudito suum corpus juris, quo uti consuerat, communicaretur, cumque ibidem notatis jungerentur editae ab Antonio Delrione et Petro Brossaeo ad singulas leges ex Miscellaneorum Scriptoribus excerptae notae. Tum Historiam Ostfrisicam ubi Emmius desiit, in haec nostra tempora deducere voluit, latet tamen, an opus hoc utilissimum ex asse perfecerit. Quin ad L. Rhodiam de jactu et de jure (quod vocant) appulsus commentarium perscripsit; Multasque res in Dicasterio nostro judicatas collegit, quae an elaborata sint, ego quoque ignoro.

Filius ipsius num huic operi par sit, eaque, quae affecta sunt, absolvere queat, equidem dubito. Solet hoc utplurimum esse Virorum eruditorum fatum!

Caetera omnem spem reconciliationis meae cum Illustri Avemanno in Te solum repositam cum habeo, enixe flagito, ut aliquando in exarandis ad Ipsum litteris mei in bonam partem meminisse velis. Paratus enim sum, culpam, si quam commisi, emendare omnem; ac reapse praestare, nihil mihi sanctius et antiquius esse, quam Viros summos colere. Vale Vir Illustris, et mihi favere perge. Dabam Embdae XII. Octobris M. DC. XCVI.