LEIBNIZ AN JAKOB THOMASIUS

His locis mirifica somnia invalescunt. Becherus Medicus, homo ingeniosus, sed polyprágmvn Comiti Hanoviae persuasit, esse in alio terrarum Orbe felices quasdam regiones, atque omnia velut divina quadam virgula fundentes, illuc duci Colonias fundarique grande imperium posse, et inde paulatim in omnem Americanam regionem. Ita inebriato Comiti pecuniolam extorsit, qua profectus ad Batavos a West-Indica societate totam Gujanam, qua mari alluitur, triginta milliarium latitudine, longitudine centum, feudi jure suo Comiti obtinuit. Reversus literas contractus eburneae capsulae inclusas praeferri sibi jussit, et hac ridicula pompa velut ovans Hanoviam ingressus est. Jam parantur omnia itineri Americano.

Quod me attinet, statui edere Librum aliquem hactenus obliteratum, ingeniosum tamen, si quid judico, Marii Nizolii, cujus Thesaurum et pueri norunt, et qui nondum aere lavantur, Librum nempe de veris principiis et vera ratione philosophandi Parmae An. 1553. 4^o editum, occasione Libri a Majoragio in eum scripti. Nimirum Caelius Calcagninus reprehenderat officia Ciceronis, Majoragius scripsit pro Cicerone, eumque Aristoteli conciliare conatur. Nizolius superveniens scribit contra utrumque, Calcagninum, quod Ciceronem impugnet, Majoragium, quod Aristotelem defendat, et conciliare Ciceroni nitatur. Majoragius Libro Nizoliano respondet. Ita tandem Nizolius hos Libros quatuor de vera ratione philosophandi edidit. Quos solos habeo, priora non vidi. Nizolius his Libris duo inprimis fuse impugnat: 1.) universalia realia, in quo argumento se Nominalem profitetur, 2.) terminos Scholasticorum. Ostendit enim fuse, nec minus eleganter quam subtiliter, scholasticos non tantum barbare, sed et parum accurate locutos fuisse. Nec vero aliorum more nudis invectivis in eorum barbariem detonat, sed et praeterea substituit alias loquendi rationes ex Cicerone et aliis veteribus haustas, imo prorsus non technicas, sed e medio sumptas, quibus ostendit, proprie, pure, atque accurate subtilissima quaeque enuntiari posse. Atque ita universam Logicam percurrit, illud urgens perpetuo, sicubi res terminis popularibus aeque facile exprimi possit, technicis illis fictitiis tantum ad obscurandum factis esse abstinendum. Constitui prolixiusculam praefationem adjungere tum de usu hujus instituti, tum quomodo mitigari debeant, quae acrius justo dicit. Te vero rogo, si quid de Nizolii Philosophia praeterea compertum habes, aut similis instituti scriptores occurrunt, id mihi suggerere ne graveris.