Des Bosses an Leibniz

Die Martis advenerunt hae P. Janningi litterae novaque Romana de re Sinensi, sed serius quam ut per currum ordinarium mitti ad Te possent. Scribit ad me Janningus de Tomo Tuo Rerum Brunsvigensium primo ad se misso ex Tuis meisque litteris nunc primum innotescere, nec se aliunde aliquid rescivisse, nedum Antverpiam allatum esse. Quaerendum erit ex Forstero cui bibliopola eum tradiderit. Quod si forte necdum misisset, mitti ad me poterit et curabo ut Colonia promoveatur Antverpiam. Quod attinet ad Vitam Venerabilis et Pii Goberti (quam alias Patribus Antverpiensibus obtuleras) gratam habeo voluntatem Illustris Leibnitii (inquit Janningus) illam curaturi nobis describendam: idque ita fieri optamus, si magnae molis non sit, aut per amicum vel cum aliis possit mitti Coloniam, inde huc facile perferendam, quod postremum ego in me recipio. Recentibus litteris Tuis paucos intra dies respondebo. Vale etc. Dabam Hildesii 20 Septembr. 1709.